ॐ ॥ हि॑रण्यवर्णा॒ः शुच॑यः पाव॒का यासु॑ जा॒तः क॒श्यपो॒ यास्विन्द्र॑ः ।
अ॒ग्निं या गर्भ॑ं दधि॒रे विरू॑पा॒स्तान॒ आप॒श्शग्ग् स्यो॒ना भ॑वन्तु ॥
यासा॒ग्ं॒ राजा॒ वरु॑णो॒ याति॒ मध्ये॑ सत्यानृ॒ते अ॑व॒पश्यं॒ जना॑नाम् ।
म॒धु॒श्चुत॒श्शु॒च॑यो॒ याः पा॑व॒कास्ता न॒ आप॒श्शग्ग् स्यो॒ना भ॑वन्तु ॥
यासां॓ दे॒वा दि॒वि कृ॒ण्वन्ति॑ भ॒क्षं या अ॒न्तरि॑क्षे बहु॒धा भव॑न्ति ।
याः पृ॑थि॒वीं पय॑सो॒न्दन्ति॑ शु॒क्रास्ता न॒ आप॒श्शग्ग् स्यो॒ना भ॑वन्तु ॥
शि॒वेन॑ मा॒ चक्षु॑षा पश्यतापश्शि॒वया॑ त॒नुवोप॑ स्पृशत॒ त्वचं॑ मे ।
सर्वाग्॑ं अ॒ग्नीग्ं र॑प्सु॒षदो॑ हुवे वो॒ मयि॒ वर्चो॒ बल॒मोजो॒ निध॑त्त ॥ १ ॥
पव॑मान॒स्सुव॒र्जन॑ः । प॒वित्रे॑ण॒ विच॑र्षणिः । यः पोता॒ स पु॑नातु मा ।
पु॒नन्तु॑ मा देवज॒नाः । पु॒नन्तु॒ मन॑वो धि॒या । पु॒नन्तु॒ विश्व॑ आ॒यव॑ः ।
जात॑वेदः प॒वित्रे॑वत् । प॒वित्रे॑ण पुनाहि मा । शु॒क्रेण॑ देव॒दीद्य॑त् । अग्ने॒ क्रत्वा॒ क्रतू॒ग्॒ं रनु॑ । यत्ते॑ प॒वित्र॑म॒र्चिषि॑ । अग्ने॒ वित॑तमन्त॒रा । ब्रह्म॒ तेन॑ पुनीमहे । उ॒भाभ्या॓ं देवसवितः । प॒वित्रे॑ण स॒वेन॑ च । इ॒दं ब्रह्म॑ पुनीमहे । वै॒श्व॒दे॒वी पु॑न॒ती दे॒व्यागा॓त् । यस्यै॑ ब॒ह्वीस्त॒नुवो॑ वी॒तपृ॑ष्ठाः । तया॒ मद॑न्तः सध॒माद्ये॑षु ।
व॒यग्ग् स्या॑म॒ पत॑यो रयी॒णाम् । वै॒श्वा॒न॒रो र॒श्मिभि॑-र्मा पुनातु । वातः॑ प्रा॒णेने॑षि॒रो म॑यो॒ भूः । द्यावा॑पृथि॒वी पय॑सा॒ पयो॑भिः । ऋ॒ताव॑री य॒ज्ञिये॑ मा पुनीताम् ॥
बृ॒हद्भि॑ः सवित॒स्तृभि॑ः । वर्षि॑ष्ठै-र्देव॒मन्म॑भिः । अग्ने॒ दक्षैः॓ पुनाहि मा । येन॑ दे॒वा अपु॑नत । येनापो॑ दि॒व्यंकश॑ः । तेन॑ दि॒व्येन॒ बह्म॑णा । इ॒दं ब्रह्म॑ पुनीमहे । यः पा॑वमा॒नीर॒द्धयेति॑ । ऋषि॑भि॒-स्संभृ॑त॒ग्ं॒ रसम्॓ । सर्व॒ग्॒ं स पू॒तम॑श्र्नाति । स्व॒दि॒तं मा॑त॒रिश्व॑ना । पा॒व॒मा॒नीर्यो अ॒ध्येति॑ । ऋषि॑भि॒स्संभृ॑त॒ग्ं॒ रसम्॓ । तस्मै॒ सर॑स्वती दुहे। क्षी॒रग्ं स॒र्पि-र्मधू॑द॒कम् ॥
पा॒व॒मा॒नी-स्स्व॒स्त्यय॑नीः । सु॒दुघा॒हि पय॑स्वतीः । ऋषि॑भि॒स्संभृ॑तो॒ रस॑ः । ब्रा॒ह्म॒णेष्व॒मृतग्॑ं हि॒तम् । पा॒व॒मा॒नीर्दि॑शन्तु नः । इ॒मं लो॒कमथो॑ अ॒मुम् । कमा॒न्थ्सम॑र्धयन्तु नः । दे॒वी-र्दे॒वैः स॒माभृ॑ताः । पा॒व॒मा॒निस्स्व॒स्त्यय॑नीः । सु॒दुधा॒हि धृ॑त॒श्चुत॑ः । ऋषि॑भि॒ः संभृ॑तो रस॑ः । ब्रा॒ह्म॒णेष्व॒मृतग्॑ं हि॒तम् । येन॑ देवाः प॒वित्रे॑ण । आ॒त्मान॑ं पु॒नते॒ सदा॓ । तेन॑ स॒हस्र॑धारेण । पा॒व॒मा॒न्यः पु॑नन्तु मा । प्रा॒जा॒प॒त्यं प॒वित्रम्॓ । श॒तोद्या॑मग्ं हिर॒ण्मयम्॓ । तेन॑ ब्रह्म॒ विदो॑ व॒यम् । पू॒तं ब्रह्म॑ पुनीमहे । इन्द्र॑स्सुनी॒ती स॒हमा॑ पुनातु । सोम॑स्स्व॒स्त्या व॑रुणस्स॒मीच्या॓ । य॒मो राजा॓ प्रमृ॒णाभि॑ः पुनातु मा । जा॒तवे॑दा मो॒र्जय॑न्त्या पुनातु । भूर्भुव॒स्सुव॑ः ॥ २ ॥
ॐ तच्छं॒ योरावृ॑णीमहे । गा॒तुं य॒ज्ञाय॑ । गा॒तुं य॒ज्ञप॑तये । दैवी॓-स्स्व॒स्तिर॑स्तु नः । स्व॒स्तिर्मानु॑षेभ्यः । ऊ॒र्ध्वं जि॑गातु भेष॒जम् । शन्नो॑ अस्तु द्वि॒पदे॓ । शं चतु॑ष्पदे ।
ॐ शान्ति॒ः शान्ति॒ः शान्ति॑ः ॥
oum || hiranyavarnah shuchayah pavaka yasu jatah kashyapo yasvindrah |
agnim ya garbham dadhire viroopastana apashshagg syona bhavantu ||
yasagm raja varuno yati madhye satyanrute avapashyam jananam |
madhushchutashshuchayo yah pavakasta na apashshagg syona bhavantu ||
yasam deva divi krunvanti bhaksham ya antarikshe bahudha bhavanti |
yah pruthiveem payasondanti shukrasta na apashshagg syona bhavantu ||
shivena ma chakshusha pashyatapashshivaya tanuvopa sprushata tvacham me |
sarvagm agneegm rapsushado huve vo mayi varcho balamojo nidhatta || 1 ||
pavamanassuvarjanah | pavitrena vicharshanih | yah pota sa punatu ma |
punantu ma devajanah | punantu manavo dhiya | punantu vishva ayavah |
jatavedah pavitrevat | pavitrena punahi ma | shukrena devadeedyat | agne kratva kratoogm ranu | yatte pavitramarchishi | agne vitatamantara | brahma tena puneemahe | ubhabhyam devasavitah | pavitrena savena cha | idam brahma puneemahe | vaishvadevee punatee devyagat | yasyai bahvistanuvo veetaprushthah | taya madantah sadhamadyeshu |
vayagg syama patayo rayeenam | vaishvanaro rashmibhi-rma punatu | vatah praneneshiro mayo bhooh | dyavapruthivee payasa payobhih | rutavaree yagnye ma puneetam ||
bruhadbhih savitastrubhih | varshishthai-rdevamanmabhih | agne dakshaih punahi ma | yena deva apunata | yenapo divyamkashah | tena divyena bahmana | idam brahma puneemahe | yah pavamaneeraddhayeti | rushibhi-ssambhrutagm rasam | sarvagm sa pootamasrnati | svaditam matarishvana | pavamaneeryo adhyeti | rushibhissambhrutagm rasam | tasmai sarasvatee duhe| ksheeragm sarpi-rmadhoodakam ||
pavamanee-ssvastyayaneeh | sudughahi payasvateeh | rushibhissambhruto rasah | brahmaneshvamrutagm hitam | pavamanirdishantu nah | imam lokamatho amum | kamanthsamardhayantu nah | devi-rdevaih samabhrutah | pavamanissvastyayanih | sududhahi dhrutashcutah | rushibhih sambhruto rasah | brahmaneshvamrutagm hitam | yena devah pavitrena | atmanam punate sada | tena sahasradharena | pavamanyah punantu ma | prajapatyam pavitram | shatodyamagm hiranmayam | tena brahma vido vayam | pootam brahma puneemahe | indrassuneetee sahama punatu | somassvastya varunassameechya | yamo raja pramrunabhih punatu ma | jataveda morjayantya punatu | bhoorbhuvassuvah || 2 ||
oum taccham yoravruneemahe | gatum yagnyaya | gatum yagnyapataye | daivee-ssvastirastu nah | svastirmanushebhyah | oordhvam jigatu bheshajam | shanno astu dvipade | sham chatushpade |
oum shantih shantih shantih ||
